Das waren die Sprüchli am Hirsmändig in Flühli

FASNACHT ⋅ Träfe Sprüche, knackig auf den Punkt gebracht: Wir präsentieren Ihnen eine Auswahl der besten Hirsmändig-Sprüchli in Flühli.

08. Februar 2016, 18:12

Chömemer no einisch zrugg uf d'Wahle
Am Schluss zöuä det ja immer nur d'Zahle
Üses Vroni isch knapp nid uf Bärn ue cho
De Franz Grüter het ihre dä Stuhl awäg gno
Bitter isch dä ganzi Lohn
Für die hunderte Plakat im ganze Kanton
Liebs Vroni, ich ha ghört sägä
Äs sig elei a dim Dirndl glägä
Du hesch ja wöuä Gränzä setze
Und gäge die Missbrüch d'Mässer wetze
Ä guete Kolleg hettmer gseit, drum weiss ich chli meh
Z'Dirndl sig z'churz gsi, mer heig dini Chnöi gseh,
hättisch dä Rock müesse drüber aber näh
De häts locker no 1000 Stimme meh gäh.




Ä neue Diräkter suecht mer bid e Sörebärger Bahne
Mer duet die Uswahl gründlech plane
Über 100 Bewärbige het mer übercho
Und sich wirklech grossi Müeh für d'Uswau gnoh
Ä Walliser het schliesslech z'Renne gmacht
Und i aunä Zytige für Sörebärg glacht
Da hettmer äntleche eine, wo öppis versteit
Wo aber bevor as är chunt scho wieder geit
De Verwaltigsrat geit a d'Sach zum zwöite Mau
De René Koller isch itz die hoffentlich richtig Wau
Sicher isch, äs git bi jedere Verwaltigsratssitzig itz Eichhof Bier
Und liebe Verwaltigsratspräsident Fredi Portmann, das säg ich dier
De Kontakt mitem Wallis chaischter i Zuekonft erspare
Und gang scho gar nömme uf Zermatt ue ga Schi fahre
Det hesch du ne Beibruch erlitte
Bisch abstransportiert worde mitem Rettigsschlitte
Ja, mitem Wallis, da isch schwierig, da simmer üs einig
Inzwüsche isch sogar ou d'FIFA dere Meinig





Ou i de Schwiz kämpfemer ums nackti Überläbä
Niene meh gits nur no öppis Chlis vergäbä
Eis isch agseit i dä nächschte Jahre
Spare, spare und no einisch spare
Äs söu aber scho wieder meh Beamti in Bärn gäh
Aber wohär wott mer das zuesätzleche Gäud de ou näh
Natürlech vo üs Stürzahler, mier hei ja dä Chlotz
Und aunä Bestrebige zum Trotz
Verringert sich nid die Bürokratie
Und mier wärde ou morn nid schlöuär si
Drum chönnt mer bi dene Flügzüg nach Amerika no jedes Mau 100
Schwizer Awäut und Beamti mitschicke
Villicht würde mer de weniger i de Formular versticke




Wemmer hüt über d'Wäut wott brichte
De gits fascht nur negativi Gschichte
Chrieg, Chrieg, fascht nüd anders überchömemer z'ghöre
Und jede Staatschef tuet uf sini Wahrheit schwöre
Das Wort Friede isch nömme i de Chöpfe inne
Jede tuet sis eigete Netz spinne
Underwägs zu üs si Flüchtlingsström
Und da isch ja für niemmer schön
Nachem Verursacherprinzip söttmer das Ganze behandle
Und nid nur Europa mitenand verhandle
Ich hätt da ä eifaichi Idee
Ich weiss aber nid, öpp mer die gärn würd gseh
Au Tag öppe 30 Jumbo-Jets vou Flüchtling nach Amerika flüge
Und dademit die ehemalig Regierig für ihres Verhalte rüge
Die chönnte Asylzentre irichte, ganz husch, husch
Und zahle müesst das Ganze de Georg W. Bush




Äs Wahljahr heimer hinderis brunge
Ä hufä si wäg jedere Stimm umegsprunge
Im Früelig het Flühli wieder 3-fach zuegschlage
Das liet de Schüpfer no schwär ufem Mage
Im Herbst isch d'SVP d'Siegeri vo de Wahle
Aber Erfolg, das bringt ou Quale
De zwöiti Bundesrat hett mer übercho
Und är het ou grad im Ueli sis Chaos übernoh
Aber, simmer ganz ehrlech, wär isch dä Parmelain
Guet äs wird itz a jedere Fraktionssitzig Wisse gäh
Ufem politische Parkett hettmer ne eigentlech nie richtig gseh
Är isch z'chlinschte Übu usem Vorschlag vor de SVP

 

Ja, dä ganz Bundesrat git eim mängisch scho z'dänke
Die wo söttä d'Schwiz stüre und länkä
Fieberhaft versuecht mer d'Beziehigä zu de EU z'erhaltä
Und glich wott das nid richtig spautä
Vor emenä Jahr het d'Sommaruga uf Brüssel müessä
Z'Einzig wsoi het chönne isch mit em Junger küssä
Hür hets de Schneider-Amman am WEF wieder probiert
Aber d'EU het ou ihn wieder abserviert
As Hirsmändigsbot hani zwar itz no öppis anders vernoh
D'EU wöu uf das Gespärch no einisch zrugg cho
Wöu ou si die Beziehig sehr interessiert
heige si drei Wuche lang aui Videos und Tonbänder analysiert
Mit Zietlupe heige si gschaffet, und sie chäme itz de Schwiz chli entgägä
Sie heige itz usegfunde, was Schneider-Ammann eigentlech heig wöuä sägä
 


Login


 

Leserkommentare

Anzeige: