PLÖDER: Vom Affen gebissen und vom Biogas-Gestank

Es ist viel passiert durchs Jahr hindurch. Verschiedene Greiflervereine der Region nehmen das jeweils zum Anlass, einen humoristischen Rückblick zu halten.

Drucken
Teilen
Plöder in Brunnen. Hier wird gerade eine Episode erzählt. (Bild Laura Vercellone/Neue SZ)

Plöder in Brunnen. Hier wird gerade eine Episode erzählt. (Bild Laura Vercellone/Neue SZ)

In der Region Schwyz halten am Dreikönigstag jeweils verschiedene Greiflervereine einen nicht ganz ernst zu nehmenden Rückblick auf das vergangene Jahr. Dabei werden verschiedene Gegebenheiten aufs Korn genommen. Ein paar Müsterchen aus den Gemeinden:

Schwyz
Laschtwägä chärelid Tonne vo Schnee – uf d Hofmatt, und ä halbi Armee – huufned ä Schanze mit derä Pracht – vom Hauptplatz her ghörsch «Stille Nacht».

Snowboardrock und Schiinwerferfluet – passed zum Chrischchindlimärcht esoo guet! – dr Gmeindrat Schwyz, vom Aff gebissen – befiehlt: Energiestadt, Fahnen hissen!

Diä Biogaas-Alaag im Feld unä stinkt, – und d Usredä vo de Betriiberä hinkt – D Kadaver-Verbrennig, diä stinkt zum Chotzä. – Jetzt gits de ä Filter, muesch nur gnueg motzä.

Z Schwyz heds hüür äs Gsangsfäscht gha, jupeidi und jupeida. – Es heig e chli weniger Sänger gha, jupeidi und jupeida. – D Fäschtchartä heig äbä vill z vill koschted – bim Fäschtakt siig nu z Mik iigroschted – jupeidi und jupeida, zvorderscht heigs en Annä gha.

Gits äs Bähndli, oder gits ä keis? – Gits ä Plaanig, oder gits nur Mäis? – Chönd Stoos und Rotäfluä nu graate? – Susch gönd üch i Sattel gu la beraate.

Steinen
De Schnee wil dä Steiner Fasnächtler ä ghörigä Strich dur d Rächnig machä – dä ganz Umzugs-Morgä schniids, es isch wahrlich nid zum Lachä. – D Umzugsroutä hed mär vorsichtshalber scho am Samschtig andersch gleid – das es kei Wagä inä Schneehuufä usä treid.

D Prozässion a Fronleichnam wird all Jahr zelebriert – es isch doch schön, wänn ds Chilävolch ums Dorf spaziert. – Bi zwiifelhafter Witterig wird diä ganz Sach i d Chilä verleid, – dummerwies hed das niämmärt a dä Musikgesellschaft gseid. – Diä wartid nämlich vor dä Chilä ussä und findids gar nid zum Lachä, – das kei Mänsch mit inne wott diä Fyrtigsprozässion mitmachä.

Uf em Stoos passiärid nu ganz anderi Sachä, – amänä Jäger isch ämäl plötzlich nümmä zum lachä; si Alkohol-Pegel stiigt ziemlich i d Höchi, – dummerwiis isch au nu d Polizi i dä Nöchi. – Drum muäs de Jäger mit uf d Wach, – det liid är afig einisch äs paar Stündli flach. – E Wuchä später stads im Blettli innä schwarz uf wyss – Jäger dörfid suffä, so viel si wend, s gid nidämal ä Verwys.

I dä Dorfzytig vom September stad gros gschribä, – weli Restaurant z Steinä nu sind übrig blibä. – Dä Spiegelbärg, dä Hirschä, ds Pöschtli und dä Adelbodä, – allsämä sind uf dä Titelsytä obä. – Luägt mär das Bild ä chli besser a, so fallt eim uf, – es isch ja de Adler, wo scho lang zuä isch, statt dä Adelbodä druf.

Brunnen
Für üsi Buure sind die zäh feisse Jahr scho längstens dure und gloffe. – Vor Jahre de Rinderwahnsinn, jetzt sinds vo Blauzungechranket betroffe. – Gimpft mönd wärde, d Geisse, alli Schaf und medigscht jedi Chueh. – Wer nid pariert, hed gar nüd z lache, er hets grad midem Richter z tue.

Ja, die gspässige Urteil hauid eim esie scho schier us de Socke! – De Bankräuber lahd me frii, das ufmüpfig Buurli muess ga hocke. – Z Läbe als Chueh würd jedem Bänkler sicher viel besser gfalle. – Er müesst si zwar impfe, würd bi dem Milchpriis aber nid überfalle.

Uf de Gmeind sind all undernämigslustig, si tönd grad e chli plane. – Zur Verstärchig ufem Büro muess e ganz versierte, der Ürsel ane. – Strasse, es Schalet im Lido, z Schützehuus, wenn s au nid tued gfalle, – es paar Chreisel, und ufem Parkplatz nu e grossi Auto-Iistellhalle. – Und de Dorfplatz! Ich meine: Nei Erwin, Du Nei, lieber nid Du-Bei!

Rauche sett me de hingäge liiberemänt überhaupt niene meh. – Ich wett einisch de Res und de Märtel ohne e feini Cigarre gseh! – Si siigid iiverstande, sie giengid de i gottsname halt ines Fümoir. – Die wärdid einisch Auge mache, wenn s heisst: das siig z Trottoir!

Jää, mit üsere Polizii, da lahd sich halt überhaupt nid la gspasse. – Si machid Kontrolle, vor allem det wo s Gäld gid, a de Strasse. – D Chliistadtstrass hends au kontrolliert, wägem Einbahn-Signal. – De Franz-Sepp isch glich duregfahre, ja nur wägeme einzige Mal. – «Wärid doch is Edelwiss ine, so hätts nüd gchoschtet, guete Maa.» Doch de Franz hed sich entschuldiget: Ich ha äbe kä Durscht gha.

Sattel
S?Wirtä idä Chronä will inä eifach nid glingä. – Mär versuächt dä Chopf numal usä z zieh us dä Schlingä. – Z Fährnseh schickt inä ä Profi is Huus, – Chönds üs glaubä z Bümi chund druus. – Dä Chef dö Grimass sprüchlät ganz redegewandt – und mär gsehd in sogar im Emilsgwand. – Doch Müüsig mit äm Amadeo isch jetzt halt Gschicht – und dä Gaschthof Chronä definitiv dicht.

Am Sattler Märcht heds hüür wider Chuäli gha – au Händlär und Puurä bis uf ei Maa. – Dä Vehändlär Moser isch nienä umä gsi, – wo är uftaucht, isch dä Märcht schier verbii. – Znächscht Jahr sötsch widär äs paar Tiärli bringä, – dass dä Märcht wider luschtig tuäd glingä.

Ä Chrummi im Mul und stinkä wenä Cheib. – Schäfli schlachtä bi läbändigäm Leib. – Mid ärä Halunggäentzündig metzgä i dä Garage innä. – Dä chunsch im Fährnseh as Schmidigs tuäd das glingä.

Mit äm frisch vorgfüärtä Auto wot dä Damianä Michi hei gah. – Doch im Sattel tuäd de Göppäl bockä und bliibt stah. – Oh der hed ä Schadä wo vill wird choschtä. – Drum tuäd mär s Auto mit Värluscht verposchtä. – Miär Greiflär gänd diär ä guätä Tipp. – Nimm doch amigs ä Bänzinkanischtär mit.

D Güdelziischtiger vo Schwyz ghörsch im Sattel obä reverierä. – Amenä Januarabig tüänd sie sich im Hirschäsaal ihlogierä. – Än chliini Rott vom Sattel isch au ihgladä als Gescht. – Äs gid än huufä z Trinkä und z Ässe, nur das Bescht. – Diä Herrä wüssid, s Nüsslä ufäm Teer isch doch Bubi-Gegi. – Nid äso, wiä ufäm Hauptplatz, uf derä Bsetzisteilegi. – Dä Linus freuts, töänd ir numä echli plagierä – und tuäd a jedäm grad än Stehchragä umä Hals montierä.

Erhard Gick/Neue SZ