STEINHAUSEN: Diese Rotznasen sind heute überhaupt nicht mehr lieb

Das Geheimnis wurde am Schmudo gelüftet. Alle Steinhauser sind stets gespannt, wer den Rotznasen wieder aufgefallen ist. Der findet sich an der Fasnacht in den Schnitzelbankversen wieder. Hier eine Auswahl.

Drucken
Teilen

Mier si die 4 Rotznäseli, z'Steihuse wohl bekannt, si früehner bravi Chinde gsi, jetz hange mer umenand. Mier wäre gärn im Färnseh cho bim Schwizer-Hit vom Jahr, doch dört hei si üs nit gnoh, werum isch üs nit klar. Drum singe mier hüt Obe halt d'Fasnachts-Hits vom Jahr.

D'Fasnacht Steihuse hed's wieder schwär, wo näme sie au s'neu Oberhaupt här. Niemer wotts mache, s'isch zum Devospringe, wahrschienlich, will das Amt kei Gäld tuet bringe. E höchi Gage wär d'Lösig, das isch wohr, de hätt's Steivätter gnueg für die nöchschte füfzg Johr.

Ganz hässig luegt er usem Salat, wo s'Auto am Morge nümm da staht. En Dieb hed gstohle ihm de Chare und isch demit ine Grabe gfahre. Will de Husheer Hans s'Auto hed offe glah, duet er grad no en saftigi Buess ifah.

Im Summer si mir im Garte gsässe, im «Szenario», druf abe hei mir alli zäme müesse zum Dokter go. Är frogt, heit Dir i eune Füdle überhaupt no Gfüehl, mit dene tüfe Spure vo dene schmale Gartestüehl?

Bi 35 Grad, s'isch tüf i de Nacht, d'Sabrina und d'Jasmin hend nur no glacht. S'Mami wird nöchschtens in Ohnmacht gheie, wenn sie sich nid cha vom Faserpelz befreie. Z'Venezuela isches doch heiss, dass Pia Corrent das nid weis?

«Im Duett choche n'ich mit Zug», het sie verzellt - so ne Unfug. Inzwüsche isch alles andersch worde, ihre Ruef, de isch verdorbe. D'Hingis gwünnt nie meh en Satz, sie schnupfi jetz schients d'Linie vom Platz.

Greenpeace rüeft: «Chömed, zeiged Muet», s'brucht Hunderti vo Nackte us Fleisch und Bluet. Fühled eu wie Adam und Eva im Paradis, es heisses Naturschauspiel uf blankem Is. Det ufem Aletschgletscher, das sind ned öppe Robbe, die, mit dene Schnäuz und dene Noppe.

Wie lang gits ächt no Servelat? Jupeidi, jupeida, gli siged kei Hüüt meh da, jupeidi heida. De Krisestab isch zäme gsässe und seit: «Ihr müend halt Bratwürscht frässe», jupeidi und jupeida.

D'Ständerotswahle si für d'SVP bös i'd Hose, oh herjee. Z'Züri und au in St. Galle, si d'Kandidate duregfalle. E Puur seit, er heb 2 Muni kauft und die derfür Ueli und Toni tauft.

Bi de CVP hets, ganz unbedrängt, im Pfister zunere Widerwahl glängt. De Marcel Scherrer, de SVP-Stärn, goht witeri vier Johr uf Bärn. Und de SP fallt nüt anders i, als für de Lang Jo Stigbügelhalter zsi.

D'FDP isch nach de Wahle frustriert, drum hei mir anere Lösig studiert. Mit so farblose Kandidate cha das au nit besser grate. Portieret doch s'nöchscht Mol nur 1 Kandidat und das am beschte uf eme schwarz-wiis Plakat.

red.